სიმღერის მეფე „ლილეო“
მბრძანებლობს მზიდან მიწამდე!
თუ აქ სვანეთი ილევა,
მაჩვენეთ, სადაც იწყება...
დამდუმებელი ბაგეთა,
ეს ხმაა რომელ მდინარის?
თუ მზე შორსაა აქედან,
მაშ, მზესთან ახლოს ვინ არის?
მუხლებში ძალა მელევა
წინწასვლით დაშინებული;
ეს თუ პატარა ღელეა,
რაღაა მაშინ ენგური?
ეს ხარ-ირემი აბრავლდა,
თუ მეხი მეხოვს მთავარი?
მითხარით, უშბა რაღაა.
თუ ეს უბრალო მთა არი.
ვინ ზარდა იავნანურით
ეს ამირანი - კლდეტანი;
თუ ეს კოშკია სვანური
რაღაა კოშკი ნესტანის?
ცაზე ღრუბელთა ფთილები -
გაფრენილ მერნის ფაფარი;
თუკი ეს სინამდვილეა,
რაღაა მაშნ ზღაპარი?