თუმც ჯერაც ადრეა, უკვე გვიან არის,

როდის ჩათავდება ცივი იანვარი.

როდის დადგებიან დარები უქარო,

აღარ გაისმოდეს ავქარი-მუქარა.

დიუნის მიჯნებთან, ოჩო ხიმინჯებთან,

დასაბამს ბარდება დრო ამჟამინდელი.

სად მკვდარ ია-ვარდში, მრუმე იანვარში

ბუნება ისჯება მკაცრი ამინდებით.

მთაგრეხილს მიჰყვება ქშენით ელმავალი,

რის ვაი-ვაგლახით თოვლში მიმავალი

და სველ მინანქარზე ჩუმი იავნანით

მოთქვამს ნიავქარი და თვლემს იანვარი.