თითები – ნეფერტიტის,

თითები – ანგელოზის

ტანჯავდა ფარაონს, როდენს,

მხრებიდან ტერფამდე

თითებით გეფერები,

ტუჩებით გეხები ოდეს.

თითები – ტიციანის,

თითები – რაფაელის

ვარდივით ფურცლავენ დილას,

გავშალოთ თითების

მთრთოლვარე დარაია

და აქვე ჩამოვსხდეთ ფრთხილად.

თითები – თინათინის,

თითები – მარიამის

მაისის ალივით მთენთავს,

ვიყიდოთ თითების

წითელი როიალი,

კონცერტი გავმართოთ მცხეთას.

თითები – ვირსალაძის,

თითები – ისაკაძის

ცვილივით ადნობენ ბექთარს,

ავაგოთ თითების

მცხუნვარე ეკლესია,

დილამდე ვილოცოთ ერთად.

თითების ხეივანში,

თითების სასახლეში

ფრთადაფრთა ვიფრინოთ ღამით,

გავშორდეთ არმაზს და

მტკვარიდან არაგვამდე

გავცუროთ თითების ნავით.

თითები – ქრიზანთემის,

თითები – იასამნის, –

ცისგულა იების ფარდი,

თითებით ვიცნობდი

ისმენეს, ესმერალდას,

თითების მიმყვება დარდი.

თითების ჰარმონიით,

თითების ანდამატით

პოეტებს კურნავდნენ ადრე,

ავდგეთ და თითების

პირველი ვერნისაჟი

მოვაწყოთ თბილისში სადმე.