ჩემი სიცოცხლე არის ხანძარი,

შემოქმედების ცეცხლით ხარება.

სულო ბოროტო, ვერ გადამძალეს,

წყეულო, გიჭირს ახარხარება.

მტანჯავ და მტანჯავ, მაინც ვერ სცხრები,

რადგან აპრილი ჩემთვის აპრილობს,

ეს სიმღერები, როგორც მერცხლები,

გულიდან მინდა ამოვაფრინო.

მიმატებ დღეთა უსინათლობას,

შხამი იღვრება შენი პირიდან,

მაგრამ სიცოცხლეს, როგორც მადლობას,

სიმღერით მაინც ღმერთთან მივიტან.