შენ გივიწყებდნენ ყოველთვის მალე,

შენ ივიწყებდი ყოველთვის გვიან,

და ახლაც იმ სხვებს წაყოლილ ქალებს

შენი ცხოვრების ქალები ჰქვია.

შენ გიშორებდნენ ყოველთვის ადრე,

შენ იშორებდი ყოველთვის გვიან;

სხვების დაცვენილ ნიღბებს და ჩადრებს

შენი ცხოვრების დღეები ჰქვია.

შენ გიმეტებდნენ ყოველთვის მალე,

შენ იმეტებდი ყოველთვის გვიან;

მეგობრებს, მტრებს და სიკეთის ალებს

შენი ცხოვრების მიზეზი ჰქვია.

შენ ერთნაირად სწამდი სიმაღლეს,

ლექსებს და სიზმრებს, ფერდობებს ქვიანს;

ხომ იყვარებდი ყოველთვის მალე,

რად შეგიყვარეს ყველაზე გვიან.