მიწის თხრაში მთიელს ვერვინ სჯობნის
ციკლიდან „პაციფიზმი“
ბრწყინავს, მთებო,
ცეცხლისფერი დილა,
თვლების ღვარით
მოიღვარა ზვარი,
მიწას ორთქლავს,
იმნაირად თბილა,
მინდვრებიდან
აიზიდა ცვარი.
სულ მცირე რამ,
სულ იოტის გვარი.
გაშუქება
დედამიწას ყოფნის,
დააბრუნე
ნიჩაბი და ბარი: -
მიწის თხრაში
მთიელს ვერვინ სჯობნის.
საჭიროა
საძირკვლისთვის სილა,
თუ გზა უნდათ,
გაიყვანონ: არი!
ვაზის ჩაყრა,
ხეხილების ცხრილვა,
არხების და
გვირაბების ღვარი;
პაციფიზმის
სამარისთვის ბარი -
საკითხია
არყოფნის და ყოფნის,
დაუნდობლად
მიდის მთელი ჯარი,
მიწის თხრაში
მთიელს ვერვინ სჯობნის.
არქეოლოგს
ხელთ მივეცით წყვილი
ბიზანტიის
დროინდელი მკვდარი,
მან ფულებზე
წაიკითხა შლილი,
ათასი მზე
და ათასი ქარი.
სთქვა: მესმისო
ვერცხლისფერი ზარი
შორეულზე
შორეული ჩობნის,
დროთა სვლაში
თუ ის არის მყარი -
მიწის თხრაში
მთიელს ვერვინ სჯობნის.
პაციფიზმის
სამარისთვის ბარი -
საკითხია
არყოფნის და ყოფნის,
ჩვენ კი ვამბობთ
მჯობნის მჯობნი არის,
მიწის თხრაში
მთიელს ვერვინ სჯობნის!
1930
საიტის "ექსკლიუზიური" მასალის გამოყენებისას აუცილებლად მიუთითეთ საიტის ლინკი!
სავტორო უფლებების დარღვევის შემჩნევის შემთხვევაში გთხოვთ დაუკავშირდით საიტის ადმინისტრაციას! litklubi@mail.ru