მრავალ შეხვედრით
მრავალ შეხვედრას, ახალგაზრდებო!
სიახლით მკვეთრით
უძლეველ ცოდნის არე გასწვდება
მრავალ შეხვედრით.
რევოლიუციის მხარდამხარ ბრძმედნი
დგანან, ვით დრონი -
იგი დარვინი, ის არქიმედი
და ნიუტონი.
ჯერ არნახული დროის ხმებიდან
მიდის ეს წელი,
ჩვენი ეპოქის მწვერვალებიდან
თუ შენ შესძელი -
წინსვლა შრომის და მეცნიერების
გონით, მარჯვენით,
თქვენ გაიმარჯვებთ, როგორც შეგფერისთ,
სრულ გამარჯვებით.
კაცთა ჭეშმარიტ ამ გამარჯვების,
კაცთა გენიის,
კაცთა სიკეთის სადარაჯოზე,
ვით გამთენიის -
მზედ სდგას ეპოქა, ყოფნა აზრდება
ბედნიერ ხვედრით,
მრავალ შეხვედრით, ახალგაზრდებო,
მრავალ შეხვედრით!
1940
საიტის "ექსკლიუზიური" მასალის გამოყენებისას აუცილებლად მიუთითეთ საიტის ლინკი!
სავტორო უფლებების დარღვევის შემჩნევის შემთხვევაში გთხოვთ დაუკავშირდით საიტის ადმინისტრაციას! litklubi@mail.ru