ჩვენი კოდორი
ღრუბლები შორი, აფრები შორი,
ახლო ხმაურობს ჩქარი კოდორი,
აგე, კოდორით აფრინდა ქორი -
ააქვს სისწრაფე... მერე როგორი!
და როდესაც ზღვას სწვდება ეს თქორი,
მსწრაფლ დადინჯდება ჩქარი კოდორი.
მირხევა მდორე, ტალღებიც მდორე
და დამშვიდების ზვირთი მეორე.
არა ამაოდ დუღდა კოდორი,
არა ამაოდ გასჭრა მთა-გორი.
იმ დროის არა ერთი და ორი
დარჩეს სიბერეს ხსოვნა-ამბორი.
მოგონებების არის ეს ტბორი:
რა ბედნიერი არის კოდორი!
1941
საიტის "ექსკლიუზიური" მასალის გამოყენებისას აუცილებლად მიუთითეთ საიტის ლინკი!
სავტორო უფლებების დარღვევის შემჩნევის შემთხვევაში გთხოვთ დაუკავშირდით საიტის ადმინისტრაციას! litklubi@mail.ru