ავტომანქანა
ჩემი ავტომანქანა
დავქოქე და გაქანდა.
პი-პი! მიჰქრის გზაზე
ასჯერ სწრაფად სხვაზე.
ეშინია ბარბის:
_ რა გიჟივით გარბის!
გადაკვეთა ქუჩა,
მოედანი, სკვერი,
გადააგდო გზიდან
ურიკა და ცხენი.
მუხრუჭები არ აქვს,
გარბის, ჰერი, ჰერი!
აადინა მტვერი
კუთხესა და კუნჭულს,
ფრთა მოტეხა ლამის
ბატის ყვითელ ჭუჭულს.
შუქნიშანი ბრაზობს:
_ რად არ იცავ წესრიგს?
წითელს ვანთებ
_ სდექ, სდექ,
შენ მაინც არ გესმის.
ქვეითი და მგზავრი,
შეაშინა ყველა,
ბარბი ისევ ყვირის
_ ნელა, ნელა, ნელა!
დავუძახოთ პატრულს,
გააჩერებს ხელად!
დათუნია ბღავის:
ვაი, თავი, თავი!
დაეჯახა ვაგონს. _
პასუხი ვინ აგოს?
_ ვინ და მძღოლმა!
– ბრაზობს დამსხვრეული ავტო:
აღარ ვეთამაშები
უწესრიგო პატრონს.
საიტის "ექსკლიუზიური" მასალის გამოყენებისას აუცილებლად მიუთითეთ საიტის ლინკი!
სავტორო უფლებების დარღვევის შემჩნევის შემთხვევაში გთხოვთ დაუკავშირდით საიტის ადმინისტრაციას! litklubi@mail.ru