ელეგია ^{ექსკლიუზივი}

ქუჩაში არავინ არ არის, უბანში არავინ არ არის,

ქალაქშიც არავინ არ არის _ სიცარიელე სუფევს.

ან რას იპოვი _ რას არა, რჩები იმედის ამარა,

ანუ ოცნების ამარა და ახდენას სთხოვს უფალს.

ვეღარ ნახავო მეგობარს _ სამძიმარს მითვლის ჰეკუბა:

მოთმინება არ გეყოფა _ მოლოდინს არ აქვს აზრი...

საქართველოში თითქოსდა ისევ გრძელდება ლეკობა,

ისევ ქართველნი გამხდარან ხარკნი ჯანდაბის ბაზრის.

და ისევ დასტურ მარტო ხარ, მარტოდ შობილი მარტოდენ,

ძლივს გახსენდება წარსულის დღეები როგორ გარბოდნენ,

გარნა-ღა ცრემლით მომდგარით _ ჩუმად რომ უპეს ადნება _

სიმარტოვეში წარსულის წამებაც მოგენატრება...წუთისოფელიც წამია, მაგრამ რა კარგი რამეა _

ის მთვარიანი ღამეც ხომ ლამის მზიანი ღამეა...

ჟამთასვლის ნატისუსალი საუკუნეთა ყროლია.

_ მიმინო გვყავდა?..

_ გაფრინდა...

_ ჩათვალე: არა გყოლია.