გაზიარება

* * * ცის შვილობილი, ქვეყნის შვილი, შვილი ნატრული

ცის შვილობილი, ქვეყნის შვილი, შვილი ნატრული -
ცხელ ფილაქანზე მიბაკუნობს თეთრი თიკანი
და თიკნის კვალზე - კმაყოფილი და გაბადრული -
მიდის პატრონი - მისი დოსტი და ოსტიგანი.

ქუჩებს დარაჯობს გულმოდგინე ჩვენი პატრული,
ჰა, უეცარი მუტაციის უტყვი ნიშანი -
ჯვაროსნის ხმალი, მეჩეთებთან ჩალმა თათრული,
ბაღდადის ხურმა, ჩაიხანა და დოსტიჯანი.

წაწალს წაწლობა ალამაზებს, ბაზარს - ბაზრობა,
ბაღდადის დუქნებს - დახლიდარი და ქარვასლობა;
ვარგი და მარგი - ყველაფერი ფეხქვეშ გაიდეს,

ჩაიძიებ და სინანულით ჩაგვეტირები,
რომ პატრულების შეუპოვარ სიმუყაითეს
ცვლის ეგზოტიკის ქარაფშუტა გაკვეთილები...