* * * მინდა რომ ჩავწვდე ზედმიწევნით (მთარგმნელი: ირაკლი სურგულაძე)
არსს და რაობას
შემოქმედების, გზის მოძებნის
გულის ძრაობის.
წასული წლების, წარსულ დღეთა
მიზეზს, მშვენებას,
საძირკველთა თუ საფუძველთა
ამოშენებას.
მინდა რომ ვპოვო სიმი რამე
ხილვის, ჩვენების,
გრძნობის და წვდომის, კვდომის, შრომის,
აღმოჩენების.
სულ მცირედზე რომ გამწვდებოდეს
ღონე და გონი,
ვნებათ ბუნებას ეძღვნებოდა
სულ რვა სტრიქონი.
გავიხსენებდი შეცოდებებს,
ახლებს და ძველებს,
მთლად უნებლიე ცთომილებებს,
მკლავებს და ხელებს.
დავწერდი კანონს ჩემი ხელით,
მის პირველ ბწკარებს,
ვიმეორებდი იმ სახელის
ინიციალებს.
მე დავკვალავდი ლექსებს ბაღად
და რტოთა ჟრჟოლვით
ვახმაურებდი ცაცხვებს ლაღად,
ნიავის ქროლვით.
ლექსს ავავსებდი მონატრებით
ჭალის შრიალის,
უცხო სიჭრელით ველ-მინდვრების,
ავდრის გრიალით.
როგორც შოპენმა შეარხია
ფიქრი თითებით _
ფოლვერკი, პარკი და სამარხი
ეტიუდებად.
ნატვრის ახდომა ატყდომაა
შურის და შარის,
ვით მშვილდი, ლამის გადამტყდარი
ფიცხელი ლარით.
1956
საიტის "ექსკლიუზიური" მასალის გამოყენებისას აუცილებლად მიუთითეთ საიტის ლინკი!
სავტორო უფლებების დარღვევის შემჩნევის შემთხვევაში გთხოვთ დაუკავშირდით საიტის ადმინისტრაციას! litklubi@mail.ru