* * * ეს არაა შენი ხელები (მთარგმნელი: შოთა იათაშვილი)
ეს არაა შენი ხელები ჩემო ძვირფასო
ეს არაა შენი ხელები
რადიომიმღების ღილაკებს რომ აწვალებენ
ეს არაა შენი ხელები
დარაბებს რომ
ხურავენ ხსნიან
შუქს ჩემი სახისკენ რომ მიმართავენ
ეს არაა შენი ხელები
იარაღს ხელში რომ მიდებენ
ვიღაცის ფოტოს რომ მაჩვენებენ
და ჯიბეში ფულს მიკუჭავენ
ეს არაა შენი თბილი ლბილი ხელები
ჩემს სახეს რომ ეხებიან
მაღვიძებენ შუაღამისას
და მიშვებენ გაურკვეველი მიმართულებით
ეს გაყინული ხელებია მე მათ კარგად ვგრძნობ
ეს ულმობელი ხელებია
ეს უსიცოცხლო ხელებია
ამ სიცოცხლის წარმმართველები
საიტის "ექსკლიუზიური" მასალის გამოყენებისას აუცილებლად მიუთითეთ საიტის ლინკი!
სავტორო უფლებების დარღვევის შემჩნევის შემთხვევაში გთხოვთ დაუკავშირდით საიტის ადმინისტრაციას! litklubi@mail.ru