გაზიარება

სოფლის გიჟის სიკვდილი

_ ვარლამიე მომკვდარა!
_ კი-კი! შეთე მომკვდარა!
_ როის, კაცო?
_ ამ დილას!
_ დიდი საქმე მომხდარა!

_ ვარლამიეს გულობიზა
სანამ ცრემლებს დაღვრიდეთ,
გეიხსენეთ, მაგის ბიჭი
რა უღმერთოდ დახვრიტეთ!
გეიხსენეთ, მაგის ცოლს რომ
თავი მოაკვლევინეთ!
საგიჟეში საწყალს ფეხი
თქვენ არ შეადგმევინეთ?
_ ჩვენ გვაბრალებთ ახლა მაგას?
_ კი! მთელ ქალაქს, მთელ სოფელს _
ნათესავებს, ნაცნობს, უცნობს,
მოკეთეს და მეზობელს!
_ ჰოდა, აგერ _ მომკვდარა!
_ სოფლის გიჟი მომკვდარა!
_ ნეტა თვითონ თუ გეიგო?
_ რას გეიგებს, მომკვდარა!

_ ვარლამიე მომკვდარა!
_ დიდი საქმე მომხდარა!